حكايتى مع التدريس

انا مدرس لكنى اعتزلت التدريس استمريت فى التدريس وقت غير طويل لكن قررت ان اتنحى عن هذا المنصب او هذا العمل ودا حدث لاسباب عديدة هاحاول اذكر بعض منها ولكن باختصار لاننى لا احب ان اطيل ولكنى سابدا من البدايه لاوضح الامر لمن يقرأ وليتسع صدر القارىء العزيز

ايام الكلية:

لما كنت ف الكلية كنت مبسوط اوى وفرحان مش عشان كنت ف الجامعه مع ان دا كان سبب فرحى برضه لكن انا كنت فرحان انى هاتخرج واشتغل مهنه انا بحبها وتخصص انا كنت بتمناه من زمان

انا من زمان وانا نفسى اكون مدرس ودا كان سبب حبى لكتير من المدرسيت اللى درسولى كنت معجب بشخصيتهم وبعلمهم وبتفانيهم فى عملهم

وفعلا بعد دراستى الثانويه دخلت كلية التربية ودخلت قسم تكنولوجيا تعليم كنا بندرس وسائل تعليميه واجهزة تعليمية وحاجات كتيرة خاصة باستخدام التكنولوجيا فى التعليم والتدريس وكنت فعلا حابب دا اوى ودرسنا كمبيوتر واستخدامه فى التدريس والبرامج والتطبيقات اللى هندرسها للطلبة وعشان مطولش عليكم اتخرجت من الكلية بتقدير حلو كان 72% ودا سنة 2002

التخرج والحصول على جواب التعيين:

كنت فرحان اوى بالتخرج وانى هابتدى اشتغل مدرس وكنت فرحان اوى لما عرفت انى ممكن ادرس كمبيوتر

وف السنه الدراسية الجديدة بعد التخرج وهى سنة 2002/2003 قدمت فى الادارة التعلينية اللى انا تابع ليها عشان ادرس بالحصة وفعلا استلمت جواب تعيين بالحصه عشان ادرس كمبيوتر فى مدرسة اعدادية ( ولحسن حظى كانت مدرستى اللى اتخرجت منها فى المرحلة الاعدادية) كنت هاطير من الفرح وانا مستلم جواب التعيين وطرت بسرعه على المدرسة

نزلت من الميكروباص ودخلت المدرسة دخلت على مكتب المدير فلقيته اول ما شافنى

قاللى : اى خدمة

قلت : حضرتك انا مدرس جديد

قال : بتدرس ايه؟معاك جواب التعيين

قلت(وانا بوريه الجواب): حضرتك انا هادرس كمبيوتر انشاء الله

قال (مستنكرا ) وهو بيبص فى جواب التعيين : كمبيوتر ولا حاسب الى؟!

وكانت مفاجأة بالنسبالى بل مفاجعة كارثة وطبعا مش معقول هاحاول افهمه انه مفيش فرق بين الكمبيوتر والحاسب الالى لانى محبتش احسسه انه مش فاهم وعديت الموضوع وكان عليا انى استلم الشغل بعد يومين وقعدت مع الاستاذ اللى ماسك الجدول وكان متفاهم واخدت جدولى واتكلت ع الله وروحت

فى المدرسة:

طبعا أنا مش هاحكى كل اللى حصل فى المدرسة لكن هاحاول احتصر انا بدات بداية حلوة وشغلت معمل الكمبيوتر اللى كان مجرد مخزن للاجهزة وكمان الطلبه كانوا مستغربين انهم هيروحوا المعمل وكانت بداية جامدة لكن الامر مطولش عشان المدرس اللى ماسك العهدة بتاعة المعمل مكنش بيجى كل يوم وبالتالى المعمل مكنش بيتفتح كل يوم كان دا بيحصل حسب مزاج صاحب العهدة وطبعا اللى زينا مينفعش يمسك عهدة اجهزة لانه متعين بالحصة وعشان اقصر هاقولكم بعض النقاط اللى عانيت منها:

· المعمل مبيتفتحش كل يوم ودا بيعطل حصص العملى

· بعض المدرسين عايزين ياخدوا حصص الكمبيوتر ويدرسوا للطلبه بدلا منها رياضيات وعلوم وانجليزى...الخ

بدعوى ان الكمبيوتر مادة ثانويه ومش مهمه والكل بينجح فيها

· ادارة المدرسة عارفه دا كله ومطنشة

· الاخطر من كدا موجه المادة اللى بيجى من الادارة التعليمية عايز تقارير فقط يهتم بالورق والتقارير جدا دون الحقيقة لدرجة انه قال باللفظ: "انا ماليش دعوة بالفصل ولا العيال انا اهم حاجة عندى ده" وكان ماسك ف ايده دفتر التحضير وطلب البيه الموجه انى اعمل جماعة الحاسب الالى اختار طالب او طالبة من كل فصل واعمل جماعة للحاسب يهتموا بانشطة واعمال خاصة بالكمبيوتر ولما قلتله هاجيب وقت منين وايه اللى ممكن نعمله فهمتنى ادارة المدرسة ان دا كله كلام فى كلام وهيبقى ع الورق بس ولما اخترت الطلبة وعملت الجماعه جماعة الحاسب الالى كان لازم اعمل اجتماع للجماعة ونختار نشاط ونعمله وطبعا مكنش فيه وقت لان مفيش حصص فاضية والطلبة مش فاضيين طول الحصص وحتى الفسحة كانت 10 دقايق ياترى الطالب هيعمل فيهم ايه هيروح الحمام ولا هياكل سندوتش ولا هيحضر اجتماع جماعة الحاسب الالى بجد حرام كانوا صعبانين عليا الطلبة

· الطلبة برضه كان ليهم دور هو الدور السلبى واللامبالاة الطلبة تحس انهم عارفين كل اللى بيدور حواليهم من المدرسين وادارة المدرسة وفاهمينه وكان فيه بعض التلميحات من بعض الطلبة توضح الكلام دا كل الحاجات دى اثرت فى رغبة العيال فى التعليم والمدرسة

· كتير وكتير هاقول ايه ولا ايه لكن اخر حاجة هاقولها بعد التعب دا كله الحصص وجماعة الحاسب كنت باخد مرتب ميقضيش سجاير او مينفعش مواصلات تتخيل كام ف الشهر ؟ 500 جنيه ياريت 400 كان ينفع 300 كنا نقول زى بعضه لكن المرتب كان ما بين 100 – 120 حسب الحصص اللى بديها دا زائد انى كنت باخد حصص احتياطى جدعنه منى وحبا ف الادارة وارضاء لرؤسائى كمان كنت با تعمل ايه الميه جنيه تأكلنى ولا تشربنى ولا احوشها ولا ايه وياريت كنا بنقبض اول باول كنا بنقبض الشهر متأخر 3 شهور

· بسبب كل النقاط اللى عدت انا اخدت قرار مرجعتش فيه قرار ابطل تدريس واسيب موضوع التعليم لانه مش هينفع . بسبب النقاط دى كرهت التدريس بعد ما كنت باعشق حاجة اسمها تدريس سبت التدريس وانا مش ندمان بل بالعكس انا مبسوط انى سبته لانى ارتحت من عذاب الضمير شغل الورق كان تاعبنى ازاى اقول عملت وعملت وانا فى الحقيقة معملتش ارتحت من الفبركة والتزوير والكذب وكمان شفتلى شغلانة افضل اكل منها عيش واكون نفسى وبيها اقدر اعمل حاجة وفعلا لقيت شغل حر وفعلا قدرت استمر وانجح فى الشغل دا.

· دى كانت باختصار حكايتى مع التدريس والمدارس

مدرس متقاعد